UMO TWENDA - EBAUME ABA

Icitendwe ca buloofwa bane calenga leelo naisanga ndeshinguluka komboni, mone ifyo abantu bekeele. Kuceele ukwatalalila panuma ya mfula yaleloka inshiku shibili ishafumako, kwati teemu kapepo kanoono. Icimwela cilepuupa, ne caalo cili na tondolo, amalaiti takuli, yaliya icipyu. Abeengi bakaboomba nabaya ku milimo. Abashele ni balya babombela pa mayanda, abalekwampa no kuwaminisha amaluba, na balya batiila ba Housewife pa Cingeleshi. Na mpo nga kwaliba na ba Officewife nangu ba* Flatwife*, fyakwishiba abalepanga ifitundu fya kulanda!

Abaana nabo abamasukulu yalilaala, kanshi baleshingulukafye mu komboni kwati tusabi mu cishiba. Utwaice twena tuli mu mabumba-mabumba kuli na ulwee uko tuleyangalila.

Efyo na ine mungulu-mungulu ndeshinguluka utumisebo, aka nayamo, namonamo ifyo balewamya amayanda, na abakuti bekala mu yashilapwa, ayo babiika ifyapusanapusana mu ma windo. Kuti wasangamo ya Ciibula-mutenge, imitenge ya ku Lagos, ne ya ku Kampala fyonse filesangwa.

Awe abantu balafika apatali pa kucimfyanya muli buno bwikashi mwandi! Eco tulemwena nomba umwaume uuli onse kuno mikooti alepaapa akacola pa kwenda pakuti amoneke ati alabomba, tumone kwati asendelemo ifya ku ncito. Kanshi maayo muli iciboboli cakulya nga apwisha ukushinguluka ne cimpwena.

Kuti cilyafye nafuma mu cifutu ca kamusebo kamo ukuti mpwenekeleko muli kambi, awe namona umuntu uyu aleisa. Akasote nga kalya kafwala Ukwa. Ikooti lilya mutiila “Boomba” iyafiita yalikubuluka, ndemona yalimona inshiku, ulusuba na amainsa iminshipendwa. Combo ya mu maini nayo tayasokapo na polishi.

Yangu taata ee! Kanshi ni Maxwell Kalukuluku, uo twabombelepo nankwe kuli bamwenye inshita sha ku bulumendo. Efyo alemoneka ifi? Awe icaalo ciikali, ciine-ciine.

“Mwapola Max! Ulamoneka?” Efyo nabangilila ukumuposha, nimwentula ngo uleishisha cisotwe.

“Emulandu walandila. Nga nshimoneka, nga taumwene! Nga iwe waba kwi?” efyo ayasuka, aleisa alesukilila pa kupalama, kwati alekumanya amako.

Awe bwangu namukumanya, twalafunkana, twaseka kwati tufumine mu kukolwa, ico twamoneene kale. Twaiminina mu mbali ya musebo, pakuti bamotoka baleipitila ilyo tuleibukisha utwa buwelewele twa ku macito utwa kale, no kuseka. Awe cawama nga pa bwinga.

Mwalishiba mwe makombe ya mfumu kulaba ukufwaya ukwishiba apo umunobe aleendela panuma ya nshita ntali. Emo twapona, ine ukulondolola utwa lupwa lwandi, apo nindila inshiku, nefyo ncita. Awe namweba nati ndewayawayafye no tutabo twa Namwelenganya, etulendiisha no kusonkela akamutanda.

Awe nao aponamo ukunshimikila ifyo ifintu fili:

“Ala mune ine ukufumafye lilya waishile ku Cilanga-mulilo, twaupeenefye ne myaka ibili tayapwile, icuupo cakontaika na Lontiya.”

“Nga cinshi we mwaume? Filya cafukiile bulya bushiku? Naumfwile uko balekulumbanya mu nyimbo sha lutambi na maoma, banamaayo baleaula no tupundu ati, ‘E BAUME ABA,’ bushe ubwaume bwalipwa mwa? Nga bwapwile shani?”

“Ala mune twikala mu caalo ca mabimbi-mabimbi. Kabili nga filya wishibe, lilya twaleupana naleikala pali yama uwalebomba ku banki. Kanshi alensakamana, nalebalika ngo lutanda. Kuti nga nafwala, iyo mukwai ni sela mu nshila. Ulupiya naalekwata ukufuma mu bukwebo bwa kwa yama ni fumfwe. “Kanshi tonse uto Lontiya alefwaya, nalepeleka. Mpaka yama ampeela na fyonse ifyo nalekabila pa kusenda Lontiya. Lontiya nao teepa kutemwa. Kuti nangu ndi mukoowa, waumfwa fooni yapolomoka. Ama I LOVE YOU imyanda mu lyashi limo. Nga aya ku mwabo nasenda uto mulongeleshe, bonse baletifye, ‘E BAUME ABA!” Efyo ashimika kufuluka-kufuluka.”

“Nga ifintu mune fyaishile cinja shani? Ulupili lwa citemwiko conse cilya lwaishile sunguluka shani?” Efyo naipusha uku ndemona uko alencencenta ukufuma pa nsapato, ukufika ku mfwi. Nalimo alemona ukuti ine ndiko bwino.

“Kalimina, inshiku shalifula mune!” efyo anjeba, uku alebwesha ifilamba. Namona uko atendeka ukulolesha mu muulu kwati alepeela Leesa imilandu pafyo apitilemo, naishiba ukuti awe bola yalipompoloka ku munandi. Bushe nalimo ba Lontiya tabaishibe amaano ya ba kale abaletiila, “Iceeni eni, ciliisha ikanga lya musuma?”

Mukomfweko bantu bandi uko umunandi Max akalalongola umo apitile nge cilooto. Pantu mu kulekelesha, Lontiya aishileishiba ukuti ba Maxwell, TEEBAUME BALYA!

Umo twenda, mwaba impilipili bane!